ILOILO CITY – Ginkumpirma sang Iloilo City Police Office nga konektado ang Muller-Britanico case sa summary execution nga natabo sang Abril 18, 2012.
Ang twin-shooting incident ang natabo sang Enero 19 sa diin patay si Alain Muller sa Brgy. Cuartero sa distrito sang Jaro kag makaligad ang pila lamang ka minutos, napatay man si Delfin Britanico sa Brgy. Nabitasan sa distrito sang La Paz sang wala makilal-an nga mga suspek.
Samtang sang Abril 18, 2012, ginpatay si Mishyrhym Occillo sa diin natukiban ang iya bangkay sa Brgy. Sooc, Arevalo, Iloilo City nga may yara sang plastic bag nga nakatabon sa iya ulo, may nakahigot nga tela sa iya bibig kag nakahigot man sang packaging tape ang iya mga kamot sa likod.
Sa interview sang Bombo Radyo kay Pol. Capt. Shella Mae Sangrines, tagpamaba sang Iloilo City Police Office, iya ginpahayag nga nakuha na nila ang resulta sang ballistic kag cross matching examination sa kaso ni Muller kag Britanico halin sa Regional Crime Laboratory 6.
Suno kay Sangrines, ila ini gilayon nga gin-trace kag na kumpirma nga ang ginatumod sang Regional Crime Laboratory 6 nga nagsantu ang armas nga gingamit sa pagpatay kay Muller kag ni Britanico sa kaso nga natabo sang Abril 18, 2012 kag ini ang sa pagkapatay kay Occillo.
Pahayag niya, naga amat-amat na athag ang imbestigasyon nga ginahimo sang special investigation task group sa kaso sang tatlo ka mga imbolbado nga nagkalamatay.
Sa tion nga mahibaluan kun sin-o ang nagpatay kay Occillo, dako ini nga lead agud nga ma solbar ang kaso nanday Muller kag Britanico amo man sa kaso ni Occillo.
Subong, ginatinguhaan sang otoridad nga makapatigayon sang background checking kay Occillo kag istoryahon man sang kapulisan ang pamilya sini.
