ESTADOS UNIDOS – Ginlaoman na sang mga kano ang pag-acquit sang Senado sa impeachment charges batuk kay US President Donald Trump.
Sa interview sang Bombo Radyo kay Bombo International Correspondent Alex Vidal direkta sa Estados Unidos, iya ginpahayag nga daw sa wala na lang sa mga kano ang nangin desisyon sang senado nga pag-acquit kay Trump bangud indi na ini big deal para sa ila.
Suno kay Vidal, normal kag wala na ginasapak sang mga tawo sa Estados Unidos ang impeachement case sang US President.
Duha ka mga butang ang indi luyag nga istoryahan sang mga kano pahayag niya –kag ini amo ang tuhoy sa pulitika kag isyu sa armas.
Indi kaangay sang mga Pilipino, ang mga kano ang indi mahilig mag debate sa publiko.
Halimbawa suno sa iya kun republican ang isa ka tawo, naga istorya lamang ini sa kaangay man niya nga republican kag indi sa democrat agud nga indi makahimo sang tensyon.
Antes pa man ang State of the Union Address ni Trump, naka desisyon na ang senado nga i-acquit ang impeachment charges bangud kontrolado sang US President ang Senado.
