DINGLE, ILOILO – Dakop sa drug buy bust operation ang manugbaligya sang karne sang baboy sa Barangay Namatay, Dingle, Iloilo.
Ang subject amo si Joey Tingson, 30 anyos kag residente sang Palmares St. Passi City.
Sa interview sang Bombo Radyo kay Pol. Capt. Fernando Punzalan Jr., hepe sang Dingle Municipal Police Station, iya ginpahayag nga samtang nagalibod sang karne si Tingson, nagadul-ong man ini sang iligal nga droga sa iya mga customer.
Suno kay Punzalan, lima ka suspected shabu ang nakuha sang otoridad sa subject lakip na ang buy bust item sa diin ginabanta P4,500 ang market value.
Gina-imbestigahan man sang kapulisan sa subong kun bala may ka-transaksyon si Tingson sa mga banwa sang San Enrique kag Barotac Nuevo nga masami niya ginalabayan kun maglibod sang karne.
