ILOILO CITY- Ginatinguhaan sang Land Transportation Office nga ma -deputized ang mga law enforcement unit ilabi na ang may kaangtanan sa pagpatuman sang layi sa trapiko.
Sa interview sang Bombo Radyo kay Atty. Gaudioso Geduspan, Regional Director sang Land Transportation Office 6, iya ginpahayag nga ini agud mas mahapos ang pagpangdakop sa mga violators sang mga ordinansa kag layi sa paggamit sang dalanon.
Suno kay Geduspan, mas ma- execute sang maayo ang pagpatuman sang layi kun deputized ang Highway Patrol Group, Philippine National Police kag mangin ang mga traffic enforcers sang syudad.
Samtang gin-athag naman ni Geduspan nga mahimo nga mag-confiscate sang lisensiya sang mga traffic violators ang sin-o man nga deputized sang Land Transportation Office.
Suno kay Geduspan, sa gwa man ukon sa sulod sang Traffic Discipline Zone sa Mandurriao, Iloilo City, mahimo mag-confiscate sang lisensya ang isa ka Land Transportation Office- deputized nga enforcer.
Matandaan nga gin-istoryahan sa ginpatigayon nga consultative meeting kag committee hearing sa Sangguniang Panlungsod ang natuhoy sa confiscation sang lisensya sang mga traffic violators.
Suno kay Councilor Ely Estante sang committee on transportation sa konseho, iya ginpahayag nga mas maayo nga maklaruhan ini agud mangin maathagan man ang syudad ilabi na ang mga drivers.
