ILOILO – Maga-umpisa na sang monitoring sa mga pantalan ang dugang nga medical personnel nga gin-hire sang Iloilo Provincial Government para sa patapna sang Novel Coronavirus sa pungsod.
Sa interview sang Bombo Radyo kay Iloilo Gov. Arthur Defensor Jr., iya ginpahayag nga ang mga medical personnel ang magapanghatag sang health declaration card sa mga pasahero sang barko kag iban pa nga sea vessel agud nga mahibalu-an sa gilayon ang ila nga travel history kag iban pa nga personal nga impormasyon.
Suno kay Defensor, magluwas sa lihok sang Local Government Unit, activated naman ang Barangay Health Emergency Response Team agud nga magpatigayon sang monitoring sa ila area of responsibility.
Ginpahayag ni Defensor nga ang Dr. Ricardo Y. Ladrido Memorial District Hospital sa Lambunao kag ang Western Visayas Sanitarium sa Sta. Barbara ang temporaryo nga magabaton sang Persons Under Investigation.
Nahibalu-an nga ang 13 ka district hospitals sa probinsya sang Iloilo ang lunsay yara sa level 1 apang may gintigana nga isolation room para sa mga pasyente nga makitaan sang sintomas sang Novel Coronavirus.
