ILOILO CITY-Hugot nga ginakampanya ni Iloilo 3rd District Representative Lorenz Defensor ang pagpatukod sang Children’s Medical Center sa Visayas kag Mindanao.
Sa interview sang Bombo Radyo kay Cong. Lorenz Defensor, iya ginpahayag nga katuyuan sang iya gin-file nga House bill 6140 ang makapatukod sang ospital nga nagadedikar sa kabataan ilabi na ang mga pigado nga indi makasarang nga gastuhan ang ila pagbulong.
Suno kay Defensor, ang nasambit nga mga ospital ang plano nga tukuron sa banwa sang Pavia ukon sa Sta. Barbara diri sa Visayas samtang sa bahin sang Mindanao ini ang plano nga patindugon sa Davao City.
Sa subong, yara na sa Committee on Health ang nasambit nga hagna kag sa pagpakigsugilanon ni Defensor kay Cong. Angelina Tan, chairman sang kumitiba, mahimo nga italana ang committee hearing para sa nasambit nga hagna sa Pebrero 24.
Dugang pa ni Defensor, imbitaron sa nasambit nga committee hearing ang mga tiglawas sang Department of Health, mga myembro sang Board of Trustees sang Children’s Medical Center sa Luzon kag iban pa nga stakeholders agud makakuha sang commitment kag maduso pa ang nasambit ng hagna.
Ginabanta nga yara sa P5billion ang budget para sa nasambit nga mga ospital apang ginatugyan na lamang sang kongresista sa Committee on Appropiration ang budget para sa duha ka mga medical centers.
