ILOILO CITY – Madamu sang halit nga matuga ang fake news ukon sala nga impormasyon.
Ini ang pahayag sang Public Relations and Marketing Practitioner nga si Ken Lerona may kaangtanan sa nagalapta nga fake news ilabi na subong nga may yara sang Novel Coronavirus.
Sa Good Morning Philippines program, ginpahayag ni Lerona nga ang fake news ang nagatuga lang sang kakugmat, pagkabalaka kag sala nga pagpati.
Suno kay Lerona, ang fake news sa social media ang daw kasubong man sa original news apang kun busisi-on sang maayo, mahibalu-an kun kun ano ang peke kaysa sa matuod nga impormasyon.
Ginpahayag ni Lerona nga ang kalabanan sa mga nagapalapta sang fake news ang may yara sang catchy headline agud nga makuha ang igtalupangod sang netizens.
Kun may makita nga balita sa social media, mas makapaayo suno sa natungdan nga basahon kag hangpon ang news article, hibaluon ang petsa kun san-o ini gin-publish kag kun san-o natabo ang insidente kag kinahanglan nga may yara sang source ukon interviewee bilang pamatuod.
Magpanalawsaw sa internet para sa reference kag mas makapaayo man nga magpati sa impormasyon gikan sa mga ahensya sang gobyerno kag sa mga legitimate media outlet kasubong sa Bombo Radyo Philippines.
Sa subong nga may yara sang krisis, dapat nga likawan ang pagpalapta sang sala nga impormasyon bangud nga indi ini makabulig sa pagtapna sang Novel Coronavirus.
