ILOILO CITY – Halos tatlo ka pilo ang numero sang teenage pregnancy sa Pilipinas kun ipaanggid sa accepted percentage sa tagsa ka pungsod.
Sa Good Morning Philippines program, ginpahayag ni Lara Jeunese Villaruel, Information Officer 1 sang Commission on Population and Development 6, nga ang teenage pregnancy sa Pilipinas ang naglab-ot sa 10.85% nga tuman kataas ipaanggid sa accepted percentage nga 4%.
Suno kay Villaruel, kun basehan ang 2019-2020 record sa teenage pregnancy sa Western Visayas, nagnubo ang numero sang mga pamatan-on nga nagabusong apang mas makapaayo kun madula na ang teenage pregnancy.
Ginpahayag ni Villaruel nga sa syudad sang Iloilo, 10 ka tuig ang pinakabata nga nagbun-ag sang lapsag rason nga dapat likawan ang pagpakighilawas.
Para naman sa mga naka-agi sa pagpaminata, mas makapaayo suno sa natungdan nga sundon ang husto nga spacing ukon lang-at sa pagbun-ag nga yara sa 3 tubtub 5 ka tuig kag ang paggamit sang contraceptives kun indi pa handa nga mag-angkon sang dugang nga anak kag agud nga makalikaw sa Sexually Transmitted Diseases.
Sa pihak sini, gin-athag man ni Villaruel nga indi tanan nga teenage mom ang tuga sang pagrebelyon kundi may iban nga nangin biktima sang sirkumstanya.
Nagakadapat nga tutukan kag sundon ang husto nga spacing ukon lang-at sang pagpaminata.
Sa pagpaathag ni Ma. Annie Ayala-Masigon, Information Officer 2 sang Commission on Population and Development 6, kinahanglan nga hatagan sang nagakaigo nga tion ang matres nga makabalik sa kinaandan nga shape ukon porma para sa mas safe nga pagbun-ag.
Suno kay Masigon, tuman ka importante ang responsible parenthood agud nga indi mapabay-an ang kabataan kag agud nga mangin estable ang pagpangabuhi sang pamilya.
Ginpahayag man ni Masigon nga antes mag-angkon sang anak, kinahanglan nga mahangpan sang mag-asawa kun ano ang ila katungdanan bilang iloy kag amay.
Magluwas sa paggamit sang contraceptives, mas maayo man nga sundon sang mag-asawa ang natural family planning.
