DINGLE, ILOILO – Padayon pa nga ginapangita ang duha sa tatlo ka mga suspek sa twin robbery hold-up sa Dingle, Iloilo nga nakapalagyo matapos ang krimen.
Duha ka robbery hold-up ang natabo pasado las singko kahapon sang kaagahon sa magkatuhay nga barangay sa nasambit nga banwa.
Una nga robbery hold-up ang natabo sa Brgy. Camambugan sa diin duha ang biktima kag ang ika duha nga insidente ang natabo sa Brgy. Tabugon sa diin isa ang biktima.
Samtang natigayon naman nga mapatay ang isa sa mga suspek nga si Dominic Fresas, 22 anyos sang Poblacion Rizal Ilawod, Calinog, Iloilo matapos ginapahayag nagbato sa mga otoridad sang gipatigayon ang hot pursuit operation.
Sa interview sang Bombo Radyo kay Police Captain Fernando Punzalan Jr., hepe sang Dingle Municipal Police Station, iya ginpahayag nga gina-verify nila sa Land Transportation Office ang plaka nga ila na rekober sa crime scene nga mahimo plaka sang motorsiklo nga gingamit sa krimen agud mahibaluan kun sin-o ang tag-iya sang motorsiklo.
Suno kay Punzalan, naka istorya man sa iya ang utod sang suspek nga si Fresas sa diin base sa iya pagsaysay, ang iya utod ang nagabyahe sang motorsiklo sa Calinog nga amo ang iya palangabuhian.
Samtang nakita man niya ang iya utod sadto nga naka istorya sa Lego-Lebuna syndicate nga amo ang grupo nga nagapangawat.
