ILOILO – Naka-canvass na ang Iloilo Provincial Government sang mga protective gear kag mga apparatus nga gamiton sang mga district hospitals nga pahamtangan sang mga pasyente nga under investigation sa balatian nga Coronavirus.
Sa exclusive interview sang Bombo Radyo kay Dr. Jerry Bionat, pinuno sang Provincial Disaster Risk Reduction and Management Office, iya ginpahayag nga nakapirma na si Iloilo Gov. Arthur Defensor Jr. sang mga purchase request.
Lakip sa mga baklon amo ang laboratory gown, mask kag iban pa nga mga protective gear.
Magluwas sini, maga-hire man sang dugang nga mga nurses kag iban pa mga hospital staff ang Iloilo Provincial Government agud magbulig sa pagbulong sa mga pasyente nga ginasuspetsahan nga may Coronavirus.
Nahibaluan nga lakip sa mga district hospitals nga magabaton sang mga pasyente nga ginasuspetsahan nga may Coronavirus amo ang nahamtang sa Balasan, San Joaquin kag Lambunao Iloilo.
Apang sa subong, gin-athag ni Bionat nga wala sang anuman nga kaso sang nasambit nga balatian sa Iloilo.
Nagpanugyan man ang natungdan sa publiko nga indi magpalapit sa tawo nga may sintomas sang Coronavirus kaangay sang ubo kag hilanat.
Likawan man suno kay Bionat ang pagpangamusta gamit ang kamot, pag-beso kag pag-agbayanay.
Nahibaluan nga sa tion nga indi masarangan sang mga district hospitals ang mga pasyente nga ginasuspetsahan nga may Coronavirus, ang mga ini ang ang i-admit sa Western Visayas Medical Center.
