ILOILO CITY – Nangin madinalag-on ang ginpatigayon nga Bombo Songwriting workshop sa 8th floor sang Sky City Tower Mapa Street Iloilo City.
Sa interview sang Bombo Radyo kay Dr. Gerardo Vincente Muyuela, dean sang Conservatory of Music sa University of San Agustin kag Musical Director sang Bombo Music Festival, iya ginpahayag nga nalipay siya nga mangin kabahin sang song writing workshop nga ginpangunahan sang Bombo Radyo Philippines.
Suno kay Muyuela, kabahin sang workshop ang pagsulat sang lyrics, paghimo sang title sang ambahanon kag pagbutang sang tono.
Ginpahayag ni Muyuela nga dako ang nabulig sang workshop ilabi na sa mga tawo nga wala pa nakaagi compose sang ambahanon.
Magluwas sini, magaserbe man ini nga giya sa mga song writers nga luyag magpasakop sa madason nga season sang Bombo Music Festival.
Nagtakop naman ang workshop pinaagi sa culminating activity sa diin ginhatagan sang kahigayunan ang kada isa nga iplastar ang ila mga ginsulat nga ambahanon.
Samtang, tuman naman ang pagpasalamat sang mga nagpasakop sa workshop.
Sa interview sang Bombo Radyo kay Dr. Jerry Bionat, pinuno sang Provincial Disaster Risk Reduction and Management Office kag isa sa mga nagpasakop sa workshop, iya ginpahayag nga madamo siya sang mga natun-an sa workshop.
Suno kay Bionat, nagasulat ini sang mga binalaybay sa diin matapos niya ini sa malip-ot nga ginutlo.
Apang sa pagsulat sang ambahanon, nadugayan siya sa diin makapila pa siya ka beses nga nag-ilis sang lyrics.
Dako man ang mabulig sang workshop suno kay Bionat sa mga aspiring song-writers kaangay niya nga wala sang formal nga education sa pagsulat sang ambahanon.
Sa pihak sang iya kasakuon sa trabaho, ginpahayag ni Bionat nga ginbakantehan niya ang iya duha ka adlaw agud magpasakop sa workshop.
Lakip sa mapabugal ni Bionat nga iya natun-an sa workshop amo ang pagbalay sang ambahanon kag pagbutang sang tono.
