ILOILO CITY – Pagpahangop kag pagdisiplina sa publiko paagi sa pagpalapnag sang good vibes ang katuyu-an sang Public Safety and Transportation Management Office sa pagpahamtang sang traffic signs nga may hugot lines sa Traffic Discipline Zone sa Sen. Benigno Aquino Jr. Avenue, Mandurriao, Iloilo City.
Sa interview sang Bombo Radyo kay Jeck Conlu, pinuno sang Public Safety and Transportation Management Office, iya ginpahayag nga 13 ka bilog nga traffic signs ang igapahamtang sa mga Loading kag Unloading areas sa Diversion Road sa bug-os nga bulan sang Pebrero.
Suno kay Conlu, magluwas sa pahanumdom may kaangtanan sa traffic rules and regulations, may yara man sang hugot lines nga nakasaad sa traffic signs.
Ginpahayag ni Conlu nga nagakinahanglan sang creativity ang pagkuha sang atensyon sang publiko ilabi na ang mga pamatan-on.
Samtang, may sabat naman si Conlu tuhoy sa mga nagapakamalaot sa nasambit nga lihok sang Public Safety and Transportation Management Office.
Sa pagpaathag sang natungdan, ang mga negatibo nga komento ang para lamang sa mga may negatibo man nga paminsaron.
Depensa ni Conlu nga nagapangita sang paagi ang mga nagabug-os sa Public Safety and Transportation Management Office agud nga mapatuman sang istrikto ang traffic rules and regulations.
