ILOILO CITY – Wala na naka-istorya personal si Iloilo City Mayor Jerry Treñas kay Presidente Rodrigo Duterte kadungan sang ginpatigayon nga special meeting kaupod ang mga local chief executives sa Pasay City.
Sa interview sang Bombo Radyo kay Mayor Treñas, iya ginpahayag nga antes pa man nag-abot si Presidente Duterte, may yara na sang diskusyon ukon briefing nga natabo nga ginpangunahan nanday Department of Interior and Local Government Sec. Eduardo Año, Department of Agriculture Sec. William Dar, Department of Health Sec. Francisco Duque III kag iban pa.
Suno kay Treñas, ginsiguro ni Duterte sa mga local chief executives nga may yara sang pondo ang gobyerno para sa pagbakal sang personal protective equipment.
Ginabanta yara sa masobra 2,000 ka mga local chief executives nga nagtambong gani wala na ang alkalde naka-istorya personal sa Presidente.
Nagpangabay man si Duterte sa mga alkalde kag gobernador sa pungsod nga himuon ang tanan nga ikasarang agud nga indi na magdugang kag magdamo ang mga biktima sang 2019 Novel Coronavirus Acute Respiratory Disease.
Ginasiguro man sang Presidente nga ang sitwasyon subong ang gkontrolado sang gobyerno.
Pahayag sang alkalde, ang mga local chief executives ang magabulig man sa mga barangay agud nga mahibaluan ang mga pumuluyo nga naghalin sa iban nga pungsod nga apektado sang virus kag kun may yara sang mga nagamasakit.
Dugang pa sang natungdan, agud nga malikawan ang paglapta sang novel coronavirus kinahanglan ang proper hygiene, paghugas sang kamot kag paggamit sang alcohol.
Likawan man ang madamo nga lugar kag kun magpangatsi kag mag-ubo, nagakadapat nga tabonan ang ilong kag hugasan gilayon ang mga kamot.
Nahibaluan nga 2:00 subong nga hapon, liwat nga makig-kita si Treñas kay Duterte sa Camp Aguinaldo kadungan sang paghatag sang mga fire truck.
