ILOILO – Nakahimo na sang mga tikang ang Iloilo Provincial Government agud nga matapna ang pipila ka mga problema sang pungsod kaangay sang African Swine Fever kag 2019 Novel Coronavirus Acute Respiratory Disease antes pa man ang ginhiwat nga diskusyon ukon briefing sang Department of Interior and Local Government , Department of Agriculture kag Department of Health kadungan sang special meeting ni Presidente Rodrigo Duterte sa mga local chief executives.
Sa interview sang Bombo Radyo kay Iloilo Governor Arthur Toto Defensor Jr., iya ginpahayag nga nag umpisa na sa pagpangudal ang Iloilo Provincial Government agud nga indi na makasulod pa ang African Swine Fever sa diin gin ban ang mga swine, pork kag pork products halin sa Luzon kag Mindanao.
Ginapabugal man ni Defensor nga ang probinsya kag syudad sang Iloilo ang ASF-Free.
Suno kay Defensor, nagpanugyan si Department of Agriculture Sec. William Dar nga nagakadapat sundon ang zoning agud indi na maglapta pa ang African Swine Fever.
Nagpangayo man ang Department of Agriculture sang kooperasyon sa mga local chief executives sa pagtapna sang ASF.
Nagpanugyan man pahayag ni Defensor si Presidente Duterte nga indi maghimo sang tikang nga mahimo magresulta sa pagsalangisag sang mga tawo.
Sa bahin naman sa tikang agud nga matapna ang 2019 Novel Coronavirus Acute Respiratory Disease, nagpanawagan si Duterte nga masarangan sang gobyerno nga papason ang nasambit nga balatian kun mag binuligay.
Suno kay Defensor, ginapaalerto na niya ang mga barangay officials sa kada banwa nga i-monitor ang mga returning residents kag mga bisita nga naghalin sa nagkalain-lain nga pungsod sa diin may yara sang travel history kag health declaration card nga kinahanglan nila sabtan.
Nakahanda naman ang mga district hospital sa banwa sang Balasan, Lambunao kag San Joaquin nga magbaton sa mga posible persons under investigation.
Pahayag sang gobernador, ginmanduan naman niya ang Provincial Disaster Risk Reduction and Management Office nga makig-istorya kay Zarraga Mayor John Tarrosa kag kay Office of Civil Defense 6 Director Roberto Nuñez nga ihanda ang evacuation center sang banwa sang Zarraga pananglitan nga indi na ma akomodar sang mga district hospitals ang mga persons under investigation.
Sa subong nagahulat na lamang si Defensor sa direktiba sang General Services Office kun mahimo na nga makapadala sang tawo sa evacuation center agud nga malimpyohan ang lugar kag naghingyo man ang gobernador sa Philippine Red Cross nga mag provide sang katre nga paga-gamiton.
