Maathag nga pagpahipos kag pagpasirado ang katuyuan sang Office of the Solicitor General matapos nag file ini sang quo warranto petition batuk sa ABS-CBN Corporation.
Sa interview sang Bombo Radyo kay Nonoy Espina, chairman sang National Union of Journalists of the Philippines, iya ginpahayag nga ang ginahimo ni Solicitor General Jose Calida ang paglapas sa hilway nga pagpalayag sa bahin sang media.
Suno kay Espina, indi nagakadapat nga mangin venue ang korte suprema sa pagpasaka sang kaso bangud nagakadapat nga i-agi ini sa Kongreso.
Ginkwestyon man sang National Union of Journalists of the Philippines kun ngaa subong lang gin file ni Calida ang quo warranto petition batuk sa ABS-CBN Corporation bangud base sa pahayag sang Solicitor General, kaangay lang ang petition nga gin file sini sa Rappler.
Mahimo man suno kay Espina nga madungan ang pag file sang quo warranto petition sa ABS-CBN Corporation kag Rappler.
Pagpanghangkat sa subong para sa Kongreso kun paano nila ipakita sa bug-os nga pungsod nga sila ang independent kag co-equal branch.
Base naman sa pipila ka mga abogado pahayag sang natungdan, ang quo warranto ang para lamang kuntani sa mga appointed opisyal sang gobyerno kag indi sa private entity.
Kun balikan ang panahon ni anay Presidente Ferdinand Marcos, gingamit sini ang militar sa pagpahipos kag pagpasirado sang media kag ini subong ang kaangay man nga ginahimo sang gobyerno apang ang ginagamit lamang amo ang layi.
Sa tion nga matigayon nga mapasirado ang ABS-CBN Corporation, mangin chilling effect ini sa tanan nga media men amo man sa mga tag-iya sang mga istasyon.
Ini bangud suno kay Espina nga mangin mahapos na lamang para sa gobyerno nga pahipuson kag siraduhan ang mga magagmay nga istasyon nga nagapaguwa sang matuod-tuod nga nagakatabo kag ginahimo sang gobyerno.
Apang ginasiguro sang National Union of Journalists of the Philippines nga apisar ano ang himuon sang gobyerno, padayon sa gihapon ang mga media men sa pagpaninguha nga mapaguwa ang kamatuoran.
