Over-stretched na ukon nagalapaw na ang responsibilidad nga ginahimo ni Solicitor General Jose Calida matapos mag file sang quo warranto petition batuk sa ABS-CBN Corporation.
Ini ang pahayag sang potical expert kag abogado nga si Atty. Joenar Pueblo.
Sa interview sang Bombo Radyo kay Atty. Pueblo, iya ginpahayag nga may yara sang iban nga option nga posible ma kwestyon ang prangkisa sang ABS-CBN Corporation nga pending sa Kongreso kag ang ginahimo ni Calida ang isa ka “unusual” sa trabaho nga sakop sang Office of the Solicitor General.
Suno kay Pueblo, indi nagakadapat nga mag file ang Solicitor General diretso sa Korte Suprema sa diin ini ang i-file una sa Regional Trial Court ukon sa Court of Appeals.
Ang pinasahi lamang amo nga nahimo na ini sadto pa ni Calida sa diin iya man nga ginpasakaan sang quo warranto petition si Maria Lourdes Sereno sa diin napahalin ini sa pwesto bilang chief justice sang korte suprema.
Apang ang ginahimo ni Calida ang may yara gid sang intensyon nga siraduhon ang ABS-CBN Corporation.
Pahayag niya, ginabutang sang Solicitor General sa alang-alang kag pagbinunggu-anay ang Korte Suprema kag Kongreso bangud ang duha ang may yara sang gahom sa nasambit nga isyu.
Kuntani dugang pa ni Pueblo nga i-dismiss na lamang sang Korte Suprema ang kaso nga ginpasaka ni Calida kag pabay-an na lamang sa Kongreso ang pending nga prangkisa sang korporasyon.
