DUMANGAS, ILOILO – Magapatawag sang emergency meeting si Mayor Ronaldo “Onal” Golez kasunod sang ginpatigayon nga joint operation kun sa diin 154 ang nadakpan nga nagapauwak sa Brgy. Balabag, Dumangas, Iloilo.
Sa interview sang Bombo Radyo kay Golez, iya ginpahayag nga patigayunon ang emergency meeting sa tion nga makapauli na siya halin sa Metro Manila gikan sa pagtambong sa pagsinapol kaupod kay Pres. Rodrigo Duterte.
Suno kay Golez, may yara sang lisensya ang Stephanie Coliseum nga ginapanag-iyahan ni anay Batanes Lone District Cong. Carlo Oliver Diasnes kag may yara man sang special permit ang pagpatigayon sang pauwak.
Ginpahayag ni Golez nga iya gid nga hibaluon kun ano ang violation sang mga nagkaladakpan agud nga mangin maathag para sa tanan.
Kadungan sini, gin-athag sang alkalde nga wala sang lamud pamulitika ang natabo nga joint operation bangud sa huring-huring sadto nga tuyo kun tani ni Diasnes nga magpadalagan sa banwa sang Dumangas.
Sa pagkamatuod suno sa natungdan, kun may lamud pamulitika, kun tani wala niya ginhatagan sang permit ang bulangan kag ang pagpatigayon sang pauwak.
Kun dimalason pa suno kay Golez, mahimo siya nga makwestyon kag mapasakaan sang kaso bangud sa nasambit nga aktibidad.
