ILOILO CITY- Nag-untat na ang byahe sang mga pribado nga salakyan nga iya sang Megaworld Libre Sakay.
Ini matapos ginreklamo sang mga transport groups sa syudad sang Iloilo sa Land Transportation Franchising and Regulatory Board- Region 6 ang nasambit nga Libre Sakay.
Sa interview sang Bombo Radyo kay Mr Raymundo Parcon, presidente sang Iloilo City Loop Alliance of Jeepney Owners and Drivers Association, iya ginpahayag nga gina-agaw sang mga units nga nagatanyag sang Libre Sakay ang ruta sang mga jeep gani nagakadulaan sang pasahero ang mga de-pampasahero nga jeep.
Suno kay Parcon, natukiban man nila nga wala sang permit kag prangkisa ang nasambit nga mga units nga nagabyahe sang ila ini gintsekyar sa Land Transportation Franchising and Regulatory Board.
Magluwas diri, wala man ginkonsulta ang mga transport groups tuhoy diri.
Sa subong, suno kay Parcon, magabalik na sa normal ang ila byahe kag kita bangud ginpauntat na ang nasambit nga libre-sakay.
Nahibaluan nga ang mga pribado nga salakyan nga ginagamit sang Megaworld libre-sakay ang iya sang Southwest Travel and Tours.
Matandaan nga sang Biyernes,Pebrero 7 , sang nagpadala sang ila complaint letter ang Western Visayas Transport Corporation kag Iloilo City Loop Alliance Jeepney Operators and Drivers Assocociation nga gilayon naman nga ahatagan sang sabat sang Land Transportation Franchising and Regulatory Board Region 6.
