ILOILO CITY- Nakapiyansa na ang 99 gikan sa 154 ka mga tawo nga nagkaladakpan sa bulangan sa Balabag, Dumangas, Iloilo sang damlag lang.
Sa interview sang Bombo Radyo kay Pol. Maj. Joeven Arevalo, hepe sang Dumangas Municipal Police Station, iya ginpahayag nga apisar madamo na ang nakapiyansa, may 55 ka iban pa nga nabilin gani mabudlay ang pag-detain sa ila.
Suno kay Arevalo,sa subong nagatinir lamang sila sa gwa sang police station kag ginabantayan sang mga pulis bangud indi man kaigo ang mga ini sa presuhan.
Ginpahayag ni Arevalo nga indi man nila madali-dali saylo sa gym sang banwa ang nabilin nga mga arestado bangud malapad ang lugar kag mabudlay sa mga pulis ang pagbantay.
Indi man sila mahimo ibutang sa mga eskwelahan bangud may mga klase na ang mga estudyante.
Angot sa nasambit nga problema, naka- request na ang Pototan Municipal Police Station sa alkalde sang banwa agud mag- provide sang tent kag tubig para sa mga arestado.
Nahibaluan nga nagpatigayon sang raid ang Iloilo Police Provincial Office kag Dumangas Municipal Police Station sa Stephanie Coliseum nga ginapanag-iyahan ni anay Batanes Lone District representative Carlo Oliver Diasnes.
