ILOILO CITY – Gilayon nga ginpapauli ang ginabanta 20 ka mga arestado nga naaktuhan nga nagapatigayon sang pauwak sa Rockwell Lumber and Cockpit Arena sa Brgy. Don Esteban, Lapuz, Iloilo City.
Sa interview sang Bombo Radyo kay Police Captain Edgar Pagot, hepe sang La Paz Police Station, iya ginpahayag nga may yara sila sang impormasyon nga nabaton nga may yara sang nagapatigayon sang pauwak sa nasambit nga bulangan.
Suno kay Pagot, ginkumpiska ang isa ka ring kag gindala sa police station ang mga nagkaladakpan kag gin-usisa kun bala may permit ang nasambit nga aktibidad.
Sang nakumpirma nga may yara sang permit, gin-blotter lang ang insidente kag ginpapauli ang mga nagkaladakpan ilabi pa nga wala sang taya ang ginpatigayon nga pauwak.
Depensa naman sang isa sa mga nagkaladakpan, patusik lang ginpatigayon sa sulod sang nasambit nga cockpit arena kun sa diin si certain Edgar Moses ang promoter.
Suno sa natungdan nga nagpahinago lang sang pangalan, may yara man sang permit ang nasambit nga aktibidad.
Ang joint operation ang ginbug-usan sang La Paz PNP kag Iloilo City Police Office.
