ILOILO CITY – Nagkalain-lain nga mga regalo ang ginabaligya subong nga valentine’s day ilabi na sa bahin sang Iloilo Central Market.
Sa interview sang Bombo Radyo kay Lily, manugbaligya sang bulak, iya ginpahayag nga mas madamo ang nagabakal sang red rose ipaanggid sa iban nga sahi sang bulak.
Sa subong, ang isa ka dosena sang rosas ukon bouquet ang nagabili sang P1,500; ang isa ka sunflower nga may yara sang anom nga red rose nga na arrange na ang nagabalor P1,000 samtang kun luyag mo naman nga isa lang ka rose, nagabili ini sang P100.
Suno kay Lily, may yara man sang blue rose nga ginabaligya balor P250 ang isa.
Samtang nag amot-amot naman ang mag classmates agud nga makabakal sang bouque of roses sa ila nga manunudlo.
Suno kay Justin Gerardo Jovero, nadesisyonan nila nga i-surprise ang ila nga manunudlo bilang pagpasalamat man nila sa maayo nga hinimuan sang ila pinalangga kag paborito nga maestra.
Nagabalor P700 naman ang bouquet nga iya ginbakal.
Samtang duha naman ka mga bouquet of roses kag isa ka balloon ang ginbakal ni Jimmy Alumbro.
Suno sa iya, ang bulak ang para sa iya nga asawa kag iloy samtang ang balloon naman ang para sa iya nga anak.
Naandan na ni Alumbro nga maghatag sang regalo sa mga pinalangga niya sa kabuhi.
Samtang magluwas sa mga bulak, may yara man sang ginabaligya nga bouquet of chocolates kag balloon.
Nakadepende sa sahi sang tsokolate ang balor sang bouquet of chocolates.
Ang mga balloons naman nga ginabaligya ang nagabalor P85 kada isa.
