ILOILO CITY – Zero ang record sang Task Force on Moral and Values Formation kun numero sang minor de edad nga nagasulod sa mga motel kag lodging houses ang pagahambalan.
Sa interview sang Bombo Radyo kay Nestor Canong, pinuno sang Task Force on Moral and Values Formation, iya ginpahayag nga pasado alas 12:00 kaina sang udto, wala sang may na record nga minor de edad nga customer ang tagsa ka tagdumalahan sang motel kag lodging houses sa syudad sang Iloilo.
Suno kay Canong, ini ang napamatud-an mismo sang incognito team sang nasambit nga task force nga nagapatigayon sang undercover operation agud nga mahibalu-an kun bala ang mga customer nga ginapasulod sa mga motel kag lodging houses ang lunsay legal ang edad.
Ginpahayag ni Canong nga antes pa man ang Valentine’s Day, iya na nga ginsapol ang mga taxi driver nga indi magdul-ong sang minor de edad nga pasahero sa motel ukon lodging house.
May kaangtanan sa kampanya sang Iloilo City Government sa pagtapna sang teenage pregnancy kag premarital sex, ginpahayag sang natungdan nga ila ginapakamalaot ang pagpanghatag sang libre nga condom bangud nga lakip sa mga nahatagan amo ang mga minor de edad.
Ginpasalamatan naman ni Canong ang Non-Government Organizations kag ang mga ahensya sang gobyerno nga nagapatigayon sang lihok agud nga matapna ang teenage pregnancy kag premarital sex.
