ILOILO CITY- Gindayaw sang pamunuan sang Task Force on Moral and Values Formation ang tagdumalahan sang mga lodging houses, motels , kag inns bangud sa manubo nga numero sang mga menor de edad, nga nagsulod sa nasambit nga mga establisimento.
Sa interview sang Bombo Radyo Iloilo kay Nestor Canong, pinuno sang nasambit nga task force, iya ginpahayag nga mas ginpasanyog nila ang kampanya nga indi pagtugutan ang mga menor de edad nga magsulod sa mga lodging houses.
Suno kay Canong, ginpatuman sang mga nagapanag-iya sang nasambit nga mga establisimento kun ano man ang nagakaigo nga pagsulundan.
Pahayag pa ni Canong, santo sa ila rekord, isa lang ka menor de edad ang narescue nga nagcheck-in sa isa ka lodging house sa bahin sang Sto. Niño Norte Arevalo Iloilo.
Dugang pa sang natungdan, ginapasalamatan nila ang mga taxi drivers kag iban pa nga mga pumuluyo nga buluntaryo ang ginpakita nga kooperasyon agud indi makasulod sa mga motels ang mga menor de edad, kadungan sang valentines day.
