TIGBAUAN, ILOILO – 90 tubtub 100 na ang nadakpan nga nagalapas sa Anti-Smoking Ordinance sa Tigbauan, Iloilo.
Ini ang kasunod sang hugot nga pagpatuman sang Smoke-Free Ordinance umpisa sang Enero subong nga tuig.
Sa interview sang Bombo Radyo kay Rexfel Trivilegio, chairperson sang Anti-Smoking Task Force sa Tigbauan, Iloilo, iya ginpahayag nga hugot nga ginapatuman ang pagdumili sa pagbaligya sang binilog ukon ting-tingi nga sigarilyo, 100 meters halin sa eskwelahan, public playgrounds, pasilidad para sa mga menor de edad kag edipisyo nga ginapanag-iyahan sang gobyerno.
Suno kay Trivilegio, sa masobra 90 ka nahatagan sang citation ticket, 10 diri ang commercial establishments samtang ang nabilin naman amo ang mga nadakpan nga nagapanigarilyo sa pampubliko nga lugar.
Ginpahayag ni Trivilegio nga ginapahanugutan ang pagbaligya sang sigarilyo kun may yara sang permit halin sa Local Government Unit.
Para naman sa mga commercial establishment nga wala nagasunod sa ordinansa, ang multa sa first offense ang nagalab-ot sa P1,000, P1,500 naman sa second offense samtang P2,000 sa 3rd offense.
Para naman sa mga nagapanigarilyo, P500 ang multa sa first offense samtang P1,000 naman sa second offense.
