MIAG-AO, ILOILO – Kapin na sa duha ka siglo nga nangin palangabuhi-an sang mga Miag-aoanon ang weaving industry nga amo ang tatak sang Miagao, Iloilo.
Sa Good Morning Philippines program, ginpahayag ni Anthony Selorio, tourism officer sang Miagao, Iloilo, nga ang weaving industry ang nangin impluwensya sang mga espanyol sang ila nga ginsakop ang Pilipinas sang 1840’s.
Suno kay Selorio, humalin sadto, napadayon ang paghimo sang Hablon tubtub nga nakaporma na sang asosasyon sa ila banwa bangud halos kalabanan ang nakahibalo sa paghimo sang Hablon cloth.
Ginpahayag ni Selorio nga ang Hablon products ang himo sa materyales nga makita man sa Miagao kasubong sang pinya, abaca kag iban pa nga indigenous materials.
Kun sumahon suno kay Selorio, ang isa ka weaver ang makahimo sang 800 meters nga Hablon sa sulod sang isa ka tuig kag may pinakamanubo nga kita nga nagalab-ot sa P250,000.
Magluwas sa weaving industry, ginpahayag sang natungdan nga may yara man sang sideline ang weavers nga makadugang sa ila kita.
Bangud sa suporta sang gobyerno sa weaving industry, may yara na sang ginpatukod nga Regional Yarn Production and Innovation Center sa nasambit nga banwa para sa mas maayo nga produkto nga mahimo ipabugal sa luwas sang pungsod.
Bilang paghatag sang importansya sa Hablon, ginpahayag sang natungdan nga may yara sang Hablon Festival nga ginapatigayon kun sa diin may nakalinya nga mga aktibidad sa bulig man sang nanari-sari nga stakeholders.
