ILOILO CITY – Tion na agud nga itib-ong kag pasangkaron ang talento sang mga Ilonggo sa patag sang arts paagi sa Iloilo City Summer Arts Festival.
Sa Good Morning Philippines program, ginpahayag ni Allyn Canja, museum officer sang Iloilo Museum of Contemporary Art kag miyembro sang Iloilo Summer Arts Festival Committee, iya ginpahayag nga ang nasambit nga festival ang natukod paagi sa Executive Order No. 116 ni Iloilo City Mayor Jerry Treñas.
Suno kay Canja, ang nagaserbe nga chairman sang komitiba amo si First Lady Rosalie Sarabia-Treñas sa katuyu-an nga iduso ang mga aktibidad may kaangtanan sa Painting, Sculpture, Music, Poetry, Dance, Architecture kag Social sculpture.
Ginpahayag ni Canja nga ang highlight sang Iloilo City Summer Arts Festival ang patigayunon sa Abril 3 tubtub Mayo 17 apang antes pa man sini, may pre-highlight activities na nga ginapatigayon nga libre para sa aspiring artists.
Suno naman sa Ilonggo Artist nga si Rock Drilon nga eksperto sa Visual Arts, indi makaigo ang isa ka semana agud nga patigayunon ang mga aktibidad may kaangtanan sa Iloilo City Summer Arts Festival.
Ginpahayag ni Drilon nga kun tani, indi lang sa tion sang festival ginapatigayon ang mga aktibidad kundi ini ang magapadayon sa kabug-usan nga tuig.
Para sa mga aspiring visual artist nga interesado, may yara sang mga work shop, exhibition kag seminar nga ginapatigayon sa nanari-sari nga venue sa palibot sang syudad sang Iloilo.
Isa ka palaagyan ang Iloilo City Summer Arts Festival para sa mga aspiring artist nga may yara sang limitado nga pondo agud nga makapaidalom sa dugang nga paghanas.
Suno kay Miguel Antonio Davao, miyembro sang Summer Arts Festival Committee for Music, may yara sang mga dinapit nga bisita sa tagsa ka aktibidad agud nga makapakigbahin sang ila kaalam kag talento.
Ginpahayag ni Davao nga antes pa man ang pagtukod sang Iloilo City Summer Arts Festival, limitado lamang ang mga work shop kag training nga ginatanyag para sa mga aspiring artist ilabi pa nga mahal ang bayad sa pagpatigayon sang private workshop.
Bilang musician, nagapati ang natungdan nga ang mga Ilonggo ang makabig nga talentado sa patag sang Arts.
