ILOILO – Pagpabutyag lamang sang hibubun-ot ang katuyuan ni Police Lt. Col. Jovie Espenido sa pagpatigayon sang press conference apisar sang gag order ni Philippine National Police Chief Police Gen. Archie Gamboa.
Ini ang pahayag sang kontrobersyal nga pulis matapos nga naulamid sa narcolist kaupod sang masobra sa 350 ka mga ginapahayag police scalawag.
Sa interview sang Bombo Radyo kay Espenido, iya ginpahayag nga kinamatarong niya ang paghatag sang pahayag sa mga katapo sang media.
Suno kay Espenido, isa ka democratic country ang Pilipinas rason nga kinamatarong man niya nga tinlu-an ang iya pangalan agud nga indi magguba ang pagsalig sang iya supporters.
Ginpahayag man ni Espenido nga kun ano man ang iya maabtan, wala siya sang may ginahinulsulan bangud nga ginahimo lang niya kun ano ang dapat nga himuon.
Sa pagkamatuod suno sa natungdan, wala man siya sang may ginabuyagyag tuhoy sa Philippine National Police ukon sa gobyerno kag sa baylo, nagasentro lamang sa iya kabuhi ang iya ginasugid sa mga katapo sang media.
Sa pihak sini, ginatugyan na lang sang natungdan sa Ginuo ang pagsolbar sa iya ginapangatubang nga pagpanghangkat.
Kasubong nga may ihibalo si Espenido sa kun sin-o ang naglakip sang iya pangalan sa narcolist apang kasubong nga nagahawid pa sa pagbuya sang pahayag ang kontrobersyal nga pulis.
Suno kay Espenido, malayo nga isa lamang ka ordinaryo nga tawo ang naglakip sang iya pangalan sa narcolist bangud nga mga validated reports ang ginabaton sang Philippine National Police.
Ginpahayag ni Espenido nga 90% nga yara sa gobyerno man ang nag-ulamid sa iya sa illegal drugs.
Nabaton na ni Espenido ang posible nga matabo sa iya matapos nalakip sa narcolist.
Suno kay Espenido, indi malayo nga patyon man siya kasubong sa iban nga personalidad nga naulamid sa illegal drugs.
Iya na lang nga ginapangayu-an sang kapatawaran kun ano man ang nabuhat niya nga sala bilang ka tawo.
