JANIUAY, ILOILO – Naga-apply pa lang sang permit ang BSP & Company, Inc. agud nga makapatigayon sang quarry operation sa nabukid nga bahin sang Janiuay, Iloilo.
Ini ang pahayag ni Atty. Arturo Cangrejo, pinuno sang Provincial Environment and Natural Resources Office, may kaangtanan sa ginareklamo nga quarry operation nga nagatuga sang huol ilabi na sa Brgy. Kuyot, Calmay, Caraudan, Yabon, Tambal kag Danao.
Sa interview sang Bombo Radyo kay Cangrejo, iya ginpahayag nga kun wala pa nakakuha sang permit ang nasambit nga kontraktor, indi pa dapat pag-umpisahan ang quarry operation nga ginpahanugutan para sa pagatukuron nga 10-km concrete road padulong sa Brgy. Quipot.
Suno kay Cangrejo, antes ginpahanugutan ang quarry operation, may yara anay sang pagsinapol nga ginpatigayon ang concerned agencies bangud nga madamo man ang nagapamalabag sa quarry operation apang ginpahanugutan ini para sa pagpasemento sang dalan.
Ginpahayag ni Cangrejo nga iya nga ipausisa kun bala nakakuha na gid man sang permit ang BSP & Company, Inc. bangud nga kun wala pa, dapat nga ipauntat ang quarry operation.
