ILOILO CITY – Makabulig sa pagtuon sang kabataan ang pagbalik sang Good Manners and Right Conduct bilang subject sa Elementary kag High School.
Nahibalu-an nga pasado na sa third and final reading ang Senate Bill No. 1224 ukon ang Comprehensive Values Education Act kun sa diin isa sa requirement sa Elementary kag High School students sa pribado kag pampubliko nga eskwelahan, ang mandatory Good Manners and Right Conduct nga subject sa sulod sang isa ka oras kada adlaw.
Sa subong, ang Good Manners and Right Conduct ang ginkakas kag ginsimpon sa iban nga subject sa Edukasyon sa Pagpapakatao kag Araling Panlipunan sa idalom sang K to 12 curriculum.
Sa K to 12 curiculum, ang Values Education ang ginatudlo sa sulod sang 30 minutes sa kada adlaw sa Elementary kag duha ka oras sa isa ka semana sa High School.
Sa interview sang Bombo Radyo kay Dr. Lea Belleza, information officer sang Department of Education 6, iya ginpahayag nga ang pagbuhi sang Good Manners and Right Conduct ang makabulig sa study habit sang mga estudyante kag agud nga maka-angkon sang disiplina.
Suno kay Belleza, ang pagkatampad, katutom kag ang kapisan ang indi na sa subong makita sa mga estudyante apang nakahanda ang ahensya nga ipatuman ang bag-o nga subject.
Kaangot sa paggamit sang gadget samtang nagaklase, ginpahayag ni Belleza nga mas makapaayo kun dumili-an ang pagdala sini sa eskwelahan.
Sa pihak sini, ginakonsiderar man sang ahensya ang pila ka concerns paagi sa public hearing.
Nagpanugyan naman ang Department of Education sa ginikanan nga sa panimalay pa lang, tudluan kag tuytuyan sa pagtuon ang ila kabataan.
