ILOILO CITY – Pagtib-ong, pagreserba kag pagpalapnag ang katuyu-an sang pagsaulog sang National Arts Month subong nga Pebrero nga may tema nga Ani ng Sining: Philippine Arts Festival.
Ang pagsaulog sang National Arts Month ang nag-umpisa sang ginpirmahan ni anay Presidente Corazon Aquino ang Presidential Decree 683 series of 1991 agud nga hatagan sang kabilinggan ang kultura sang Pilipinas.
Sa Good Morning Philippines program, ginpahayag ni Maria Karen Gayanilo-Felicio, tourism officer sang Guimbal, Iloilo kag presidente sang Iloilo Tourism Officers Association Inc., nga ang Arts ukon Sining ang natunga sa visal, music, dance, culinary, theater, architecture, film kag iban pa.
Suno kay Felicio, mabudlay ang pagtib-ong sang arts nga isa ka soft project apang sa pihak sini, ginatinguhaan sang cultural workers nga itib-ong kag ipreserba ang kultura sang Pilipinas.
May kaangtanan diri, may yara sang patigayunon nga culminating activity sa Marso 10 sa diin apat ka mayor nga topiko ang igapaathag sang mga dinapit nga bisita.
Samtang, suno naman kay Dr. JJ Jimenez Patubo, pinuno sang Municipal Culture, History, Arts and Tourism Office sang San Enrique, Iloilo, indi dapat nga mangin ignorante sa kaugalingon nga kultura.
Sa pagpaathag ni Patubo, madamo pa sang mga kultura nga unpublished rason nga iya gintinguhaan nga makahimo sang libro nahanungod sa folk dances nga wala pa nabalhag.
Ginpahayag ni Patubo nga ginaduso gid sang Iloilo Tourism Officers Association Inc. ang motto nga ‘Preserve, Promote, Propagate’ agud nga mahibalu-an sang ulihing tubo ang intangible heritage sang Pilipinas.
