ILOILO CITY – Kinahanglan nga mangin responsable agud nga makalikaw sa sunog samtang nagahilapit ang summer ukon tig-ilinit.
Sa Good Morning Philippines program, ginpahayag ni Fire Chief Inspector Melanie Habawel, pinuno sang Operations Division sang Bureau of Fire Protection 6, nga ang Fire Prevention Month ang ginasaulog sa tagsa ka bulan sang Marso nga highlight sang summer sa Pilipinas.
Suno kay Habawel, sa tion sang tig-ilinit masami nga nagakatabo ang sunog apang kun tani, indi lang sa bulan sang Marso dumdumon ang Fire Prevention.
Ginpahayag ni Habawel nga masami nga nagakatabo ang sunog kun ikit-ikit ang mga balay nga human sa light materials kag kun tuman ka damu ang populasyon.
Magluwas diri, isa man sa mga rason amo ang electrical short circuit, overloading, illegal connections, kapabayaan sa paggamit sang appliances, pagsindi sang kandila ukon pagdabok sang kalayo.
Lakip naman sa masami nga nagakatabo amo ang structural fire, post fire, residential fire kag grass fire.
Sa syudad sang Iloilo suno kay Habawel, may yara sang 12 ka mga substation kag ini ang nakatuon sa mga barangay nga ginakabig fire prone.
As of February 8, 2020, ginpahayag sang natungdan nga naglab-ot lamang sa 8 ang structural fire nga mas manubo sang 50% kun ipaanggid sang 2019.
Sa bahin sang Bureau of Fire Protection, ginpahayag ni Habawel nga may yara sang mga nakalinya nga aktibidad bilang kabahin sang kampanya agud nga makalikaw sa sunog.
