ILOILO CITY – Sapulon ni Iloilo City Mayor Jerry Treñas si Liga ng mga Barangay President Irene Ong tuhoy sa ginaduso nga buksan 24/7 ang mga barangay hall.
Sa interview sang Bombo Radyo kay Treñas, iya ginpahayag nga apisar gab-i kag sa tion sang weekend, may yara sang naga duty nga barangay ukon appointed official agud nga makahatag sang bulig ukon serbisyo sa tion sang emerhensya.
Suno kay Treñas, iya gid nga ginakonsiderar ang pagpanghangkat sang barangay officials bangud nga kinahanglan pa nila nga ilisan ang duty schedule agud nga magsanto sa iya ginaduso nga 24/7 schedule.
Ginpahayag ni Treñas nga antes niya ipatuman ang nasambit nga plano, hibaluon niya anay ang mangin sentimiyento sang Liga ng mga Barangay.
Ginakabig naman ni Liga ng mga Barangay President Irene Ong nga kasubong na sang 24/7 ang duty sang barangay kag appointed officials.
Ini bangud nga suno kay Ong, apisar weekend ukon sa tion sang gab-i, on-call ang tanan nga barangay officials.
Ginhalimbawa ni Ong ang iya ginapamunu-an nga Barangay President Roxas sa City Proper nga tuman ka gamay kag wala sang barangay tanod bangud nga wala man sang interesado nga pumuluyo.
Bangud sini, ginpahayag sang natungdan nga magapakig-angot siya sa Department of Interior and Local Government agud makapangayo sang panugyan kun ano ang iya himuon.
