DUMANGAS, ILOILO – Nagbaisay ang mga trisikad kag e-bike drivers sa Dumangas, Iloilo bangud sa pag-agaway sang pasahero.
Sa interview sang Bombo Radyo sa trisikad driver nga nagpahinago lang sa pangalan nga Boy, iya ginpahayag nga nangin kompetensiya na nila sa pagbyahe ang e-bike drivers.
Suno kay Boy, gina-agaw sang e-bike drivers ang parking lot nga gintalana para sa trisikad drivers nga may yara sang permit nga makabyahe.
Ginpahayag ni Boy nga apektado ang kita nila nga trisikad drivers bangud nga sa subong, halos katunga gid ang nadula sa ila.
Samtang, gin-athag naman ni Atty. Gaudioso Geduspan, Regional Director sang Land Transportation Office 6, nga wala sang otoridad ang ahensya nga makapangdakop sang e-bike driver.
Suno kay Geduspan, dakpon lang ang e-bike driver sa tion nga magbyahe sa national road nga ginadumili-an na sa subong sang gobyerno.
Ginpahayag ni Geduspan nga ang regulation sa e-bike ang katungdanan na sang Local Government Unit.
May yara na sang temporaryo nga Memorandum of Agreement sa tunga sang trisikad, e-bike kag trcycle drivers sa Dumangas, Iloilo.
Ini mismo ang ginkumpirma sa Bombo Radyo ni Mayor Ronaldo ‘Onal’ Golez kasunod sang kinagamo sa tunga sang mga driver bangud sa pag-agaway sang pasahero.
Suno kay Golez, sa subong, wala pa sang ordinansa nga nagahatag sang pahanugot sa pagbyahe sang e-bike apang ginapahanugutan lamang ini bangud sa konsiderasyon niya bilang Local Chief Executive.
Ginpahayag ni Golez nga nakasaad sa Memorandum of Agreement ang pagsulundan nga ginkasugtan sang mga driver agud nga malikawan ang gamo.
Ang problema lang sa subong suno kay Golez amo nga wala sang alternatibo nga dalan sa ila banwa para sa mga tricycle, trisikad kag e-bike matapos nga gindumili-an ang pagbyahe sa national road nga nalakip sa orihinal nga route plan sang nasambit nga mga Public Utility Vehicle.
