ILOILO CITY – Nangin “defining moment” bilang isa ka manugwaragwag para kay Bombo Jenil Demorito, Asst. Vice President for AM Division sang Bombo Radyo Philippines, ang iya nangin eksperyensiya sang panahon sang EDSA People Power Revolution sang Pebrero 22 tubtub 25,1986.
Sa interview sang Bombo Radyo kay Bombo Jenil, iya ginpahayag nga sang iya inagihan bilang isa ka reporter tuman ka halandumon nga mabutang siya sa sentro sang isa ka hitabo nga nagbag-o sa dalagan sang kasaysayan sang pungsod kag sang pumuluyong Pilipinhon.
Bilang isa ka Bombo reporter, iya napamatud-un kun paano manindugan ang mga katapo sang Bombo sang siya nalang ang nagaisahanon nga reporter nga nabilin sa EDSA samtang ang iban nga estasyon ang nagbiya na.
Dugang pa ni Bombo Jenil, literal nga ginhanda niya ang iya kaugalingon sa kun ano man ang matabo sa iya samtang nagapadayon siya sa pagdul-ong sang balita rason nga nagpamilin-bilin na siya sa iya pamilya diri sa Iloilo samtang ginasuroy niya ang EDSA agud lang madul-ong ang balita sa mga pumuluyo.
Sa pihak nga bahin, ginpatpat man niya ang importansiya sang pagdumdom sang maragtas sang Pilipinas ilabi na ang EDSA People Power Revolution nga natabo sadtong Pebrero 22-25,1986.
Suno sa iya, ang EDSA Revolution ang nagtudlo sa aton sang gahum sang nagahugpong kag nagaisa nga tagipusuon kag panghuna-huna.
Isa ka team gikan sa Bombo Iloilo ang ginpadala pinaagi sa “last plane out” gikan sa Iloilo Airport padulong sa Makati News Bureau agud mag-augment upod na diri si Bombo Jenil.
Suno kay Bombo Jenil, kun dugangan ini sang determinasyon,wala sang imposible sa pag-angkon sang aton handom bilang pumuluyong Pilipinhon.
Bangud sa pagpangisog sang network,wala nadalukan ang pumuluyo sang mga impormasyon nga kinahanglan nila mahibaluan samtang nagapadayon ang EDSA People Power Revolution apisar nabutang sa peligro ang operasyon sang network.
Pahayag niya, magluwas sa dunang manggad kag tanan nga sahi sang resources; manggaranon ang mga Pilipino sa abilidad; kaalam kag maayo nga paminatasan agud panginpuslan ini nga mga bugay nga magadul-ong sa aton sang ano man nga luyag naton maangkon ilabi na ang kauswagan bilang isa ka nasyon.
Nahibaluan nga subong nga adlaw ang ika-34 nga anibersaryo sang EDSA People Power Revolution.
