ILOILO CITY – Madugay na nga problema sa Veteran’s Village, Iloilo City ang illegal parking kag ang on-road parking.
Ini ang ginpahayag sa Bombo Radyo ni Barangay Kagawad Rogelio Tacurda sang nasambit nga lugar, kun Oplan Hawan ang pagahambalan.
Suno kay Tacurda, kalabanan sa mga naga on-road parking ukon naga illegal parking amo ang mga pulis nga naga duty sa Police Regional Office 6.
Ginpahayag ni Tacurda nga bilang barangay official, ila man nga ginasaway ang mga nagalapas sa ordinansa apang nagakatahap man sila nga magsaway sa law enforcers.
Magluwas sa mga pulis, indi man mahinago suno sa Barangay Kagawad nga may yara sang illegal parking ilabi na kun may barko nga magdungka sa pantalan.
Sa pagpaathag naman ni Police Lt. Col. Joem Malong, tagpamaba sang Police Regional Office 6, indi exempted sa layi ang mga pulis ukon iban pa nga katapo sang law enforcement agency.
Suno kay Malong, kun may yara sang naga illegal parking ukon naga on-road parking, kinahanglan nga magpangsaway ang mga barangay official.
Ginpahayag ni Malong nga mahimo man nga ipahibalo sa Police Regional Office 6 kun sanday sin-o nga mga pulis ang salawayon apang mas makapaayo kun hatagan gilayon sang ticket of violation ang mga wala nagasunod sa ordinansa agud nga madudla.
