MALAYSIA – Nakakita ka na bala sang wedding cake nga naka upside down kag naga-amat-amat panaog nagikan sa kisame?
Sa mga nagaplano nga magpakasal, abah mahimo nga ang ini nga cake ang mangin ideal sa imo ginahandum nga kasal.
Sa Malaysia, napawow ang mga guest sa kasal sang Malaysian actors nga sanday Zahirah Macwilson kag Aiman Hakim Redza’s bangud sa pinasahi nga cake.
Mas nakuha ang atensyon sang tanan sang nag-amat-amat na panaog ang cake bangud indi ini kaangay sang iban nga kasal nga ang cake nahanda na sa lamesa kag igaslice nalang.
Ang nasambit nga cake ang nangin sentro sang tanan imbes nga magafocus kuntani ang mga tawo sa newlywed couple.
Suno naman sa naghimo sang cake nagikan sa isa ka kilala nga cake shop sa Malaysia, ang nasambit nga ideya ang naisipan sang iya utod, kag ang kasal nanday Zahirah kag Aiman ang nangin palaagyan agud mapakita nila ang ila makabig ‘golden idea’.
Tuman naman ang kalipay sang duha ka bag-ong kasal samtang ginaslice ang amo nga cake bangud magluwas sa enggrande nga seremonya, mas nangin enggrande pa kag indi malimtan ang ila kasal bangud sa indi kinaandan nga cake.
Sa subong, padayun nga gina-istoryahan sang kadam-an ang nasambit nga chandelier cake kag nakaangkon na ini sang pagdayaw nagikan sa mga persona sa bug-os nga kalibutan.
