DENMARK – Ginakulang na ang supply sang sanitizers sa Denmark kasunod sang pataas sang kaso sang Coronavirus Disease 2019 (COVID)-19.
Nahibalu-an nga sa pinaka-ulihi nga data, naglab-ot na sa 3 ang kumpirmado nga kaso sang COVID-19 sa Denmark.
Sa interview sang Bombo Radyo kay Joy Nielsen, Filipina nga nakapamana na sa nasambit nga pungsod, iya ginpahayag nga may yara sang panic-buying ilabi na kun hand sanitizers ang pagahambalan.
Suno kay Nielsen, ang pinaka-ulihi nga nagpositibo amo ang journalist nga naghalin sa Italy apang pagkaligad sang pila ka adlaw, nakitaan sang sintomas ang pasyente.
Bangud sini, gilayon nga ginpaidalom sa quarantine ang pasyente lakip na ang iya pamilya kag ang co-worker agud nga masigurado nga wala sila nalatnan sang virus.
Ginpahayag ni Nielsen nga sa subong, indi pa tanto nga mabatyagan ang COVID-19 scare sa Denmark apang istrikto nga wala na ginapabalik sa trabaho ang mga may yara sang sakit, ginapanugyan ang paggamit sang alcohol, hand sanitizers kag facemask kag ginalikawan ang pagguwa sa balay kun indi man lang importante.
May kaangtanan diri, ginpahayag sang natungdan nga indi niya malikawan nga magkabalaka ilabi pa nga madasig nga maglapta ang nasambit nga virus.
