ILOILO CITY – Ginakilala bilang isa ka madasig nga pamaagi sa pagresolba sang construction dispute sang duha ka partido amo ang pinaagi sa arbitration.
Sa programa Dura Lex Sed Lex, ginpahayag ni Atty. Ricardo Ongkiko,Presidente sang Philippine Institute of Construction Arbitrators and Mediators, iya ginpahayag nga ang arbitration ang isa ka pribado, madasig kag mas barato nga paagi agud maresolba ang isa ka indi pag-intindihanay sang duha ka partido.
Suno kay Ongkiko, tinutuyo sang arbitration nga maresolba ang mga commercial disputes sa pribado nga proseso.
Pahayag pa ni Ongkiko, sa arbitration ang partido mismo ang nagapili sang arbitrator ukon ang nagaserbe bilang pannel of judges.
Sa tion nga indi magustuhan sang isa ka partido ang arbitrator, ang arbitration commission ang magapili sang arbitrator base sa ila listahan sang mga arbitrators.
Isa sa mga maayo nga madulot sang arbitration amo nga sa sulod sang anom ka bulan maresolba ang kaso.
Lakip sa mga kaso nga mahimo ma arbitrate amo ang mga dispute sa kontrata, samtang indi naman mahimo ipaagi sa arbitration ang labor cases, jurisdiction sang korte, civil status bilang isa ka tawo, validity sang kasal, legal separation kag illegal cases.
Dugang pa sang natungdan, mas madasig nga makadesisyon ang korte sa mga importante nga kaso kaangay sang kaso kriminal, kun ang mga commercial cases ang yara sa idalom sang arbitration.
