ILOILO CITY- Ang varicose veins ang nagahabok kag nagabaliskad nga mga ugat nga makita sa idalom sang panit kag kalabanan nga makita sa paa ukon tiil apang mahimo man nga magporma sa iban pa nga bahin sang lawas.
Sa programa Dr. Bombo, ginpahayag ni Dr. Elvian Tiangga, nga ang varicose ang makuha kun tuman kalawig sang pagtindog ukon pagpungko.
Suno kay Tiangha, ang mga tawo nga may varicose, mahimo makabatyag sang pagpalamuypoy sang tiil, apang kalabanan, wala man nagatuga sang inkonbinyente sa is ka tawo.
Pahayag pa ni Tiangha, pila ka mga sintomas nga may varicose amo nga may discoloration, nagahubag nga bukong-bukong, pagpalamuypoy sang tiil kag iban pa.
Kalabanan naman nagakatabo ang varicose suno kay Tiangha sa bahin sang mga babayio bangud may yara sang pagbag-o sa hormones kaangay sang pagbusong, menopause, pre menstrual period.
Pila ka pamaagi suno kay Tiangha nga malikawan ang varicose amo ang pag-ehersisyo, pagbuhin sang timbang, pagbayaw sang tiil kag paglikaw sa madugay nga pagtindog ukon pagpungko.
Kun nagatuga na sang problema sa imo paghulag ang varicose suno sa natungdan, gilayun nga magpakonsulta agtud mahatagan ini sang nagakaigo nga atensyon.
