ILOILO CITY – Gin-relieve sang Police Regional Office 6 ang commander sang Regional Mobile Force Battalion 6 matapos nga napatay ang apat ka mga pulis kag 26 ang pilason sang mahulog ang truck sa pil-as sa Barangay Ginomoy, Alimodian, Iloilo.
Sa press conference, ginpahayag ni Police Regional Office 6 Director PBGen. Rene Pamuspusan nga ang gin-relieve sa pwesto amo si PLtCol. Leo Batiles bangud sa kakulangan nga nakita sang pamunuan sa iya nga bahin.
Magatal-os sa posisyon ni Batiles amo si PLtCol. John Lemuel Villafranca.
Suno kay Pamuspusan, pamunuan sang Deputy Regional Director For Administration ang imbestigasyon sa natabo nga aksidente.
Ginasiguro man sang Police Regional Office 6 nga mabuligan ang pamilya sang mga pulis nga napatay sa diin ang benepisyo ang gilayon nga ihatag.
Sa subong, 14 ka mga pulis ang na discharged samtang 12 naman ang nagapabilin sa ospital.
Nahibaluan nga base sa una nga ginpaguwa nga rekord sang Police Regional Office 6, 32 tanan ang mga pulis nga sakay sa truck sang nahulog ini sa pil-as apang gin-athag sang pamunuan nga 30 lamang ang nakasakay bangud ang duha ang nagpabilin sa kampo.
