ILOILO CITY – Temporaryo nga nagatinir sa Fort San Pedro National High School ang mga nasunugan sa Brgy. Gen. Hughes-Montes, Iloilo City.
Sa pinaka-ulihi nga data, naglab-ot sa 21 ka balay ang nasunog samtang 13 naman ang partially damaged kag ginapahayag nga 30 ka pamilya ang naapektuhan.
Sa interview sang Bombo Radyo kay Brgy. Kagawad Rannie Palomo, iya ginpahayag nga ang kalayo ang ginapahayag naghalin sa balay ni certain Weng-Weng Camiguin nga bag-o lang nagtinir sa ila lugar.
Suno kay Palomo, labi nga ginakinahanglan sang mga nasunugan amo ang banig kag iban pa nga gamit pantulog, kitchen utensils, bayo kag pagkaon bangud nga kalabanan ang wala sang may nasalbar nga gamit.
Ginpahayag ni Palomo nga madasig nga naglapta ang kalayo bangud nga ikit-ikit ang balay nga himu sa light materials.
Ginapahayag nga kuryente ang ginhalinan sang sunog kun sa diin nabudlayan pa ang mga bombero sa pagresponde bangud nga footwalk lamang ang alagyan pasulod sa lugar nga ginluntaran sang sunog.
Samtang, wala gid sang may nasalbar nga gamit ang pamilya Gelar sa sunog nga nagluntad kaina sang hapon.
Suno kay Zenaida Gelar, tuman ka dasig nga naglapta ang kalayo bangud nga ikit-ikit ang balay kag mamadlos ang hangin.
Bisan ang iya balay nga human sa semento ang wala nakasalbar sa sunog apang iya lang nga ginapasalamatan nga wala sang may napatay sa iya pamilya.
Sa pagkamatuod suno sa iya, Television set kag ang mga bayo nga iya ginpalabhan sa laundry shop ang gamit nga nabilin sa ila.
