SINGAPORE – Duha ka mga panibag-o nga kaso sang mga nag positibo sa coronavirus disease 2019 ang na rekord sa Singapore.
Isa diri ang Filipina domestic helper, 34 anyos samtang ang isa naman ka biktima amo ang 68 anyos nga Singaporean.
Sa interview sang Bombo Radyo kay Roberto Catipunan, Jr. direkta sa Singapore, iya ginpahayag nga may yara na sang kabug-osan nga 108 ka mga kaso sang COVID-19 ang Singapore sa diin 78 diri ang na discharged kag 30 ang nagapabilin sa ospital.
Suno kay Catipunan, ang 34 anyos nga Overseas Filipino Worker ang ika-108 nga nagpositibo sa virus.
Nalatnan lamang pahayag niya ang Filipina sang iya mismo nga employer nga ika-101 nga biktima sang COVID-19.
Bangud sa coronavirus disease 2019 scare, nagnubo sang ginbanta 30% tubtob 40% ang ekonomiya sang Singapore.
Apang kun ipaanggid sang Enero kag Pebrero, mas maayo na ang subong nga bulan sang Marso bangud nga may tawo na nga nagalagaw sa dalan ipaanggid sadto nga daw halos wala sang tawo sa dalan.
Dugang pa sang natungdan, kun sadto nagabukas ang mga department stores sa Singapore tubtob 10:00 sang gab-i, sa subong ginhimo na lamang ini tubtob sa 8:00 sang gab-i.
