ILOILO – Padayon nga gina-imbestigahan sang Police Regional Office 6 ang kabangdanan sang pagkahulog sang dump truck nga ginasakyan sang 6O1st Mobile Force Company sang Regional Mobile Force Battalion 6 nga nangin resulta sa kamatayon sang apat ka mga pulis kag 26 ang mga pilason.
Sa interview sang Bombo Radyo kay PLt Col Joem Malong, tagpamaba sang Police Regional Office 6, iya ginpahayag nga ang Regional Investigation and Management Division ang nagapamuno sang imbestigasyon sa diin maga imbitar man sang isa ka mechanic ang pamunuan agud nga mahibaloan ang rason sang aksidente.
Suno kay Malong, lakip man sa imbestigahan kun ngaa gintingob tanan nga 30 ka mga pulis sakay sa isa lang ka truck dala ang ila tagsa ka mga bag, vest, armas kag helmet nga nagadugang sang bug-at.
Paathag sang natungdan, sa tion nga may maabot nga bag-o nga equipment ukon salakyan, may yara sang ginapatigayon nga training kag gina orient man ang mga pulis.
Sa tagsa ka unit, may yara man sang designated drivers kag ang mga pulis ang may yara sang specific nga item ukon katungdanan.
Indi lamang mapat-od ni Malong kun bala bilang driver gid man ang katungdanan sang nagmaneho sang dump truck nga ginasakyan sang mga pulis nga naaksidente sa Barangay Ginomoy, Alimodian, Iloilo.
