Mga Filipino sa Austria, wala sang pagsalangisag apisar nga may yara sang kaso sang COVID-19 sa nasambit nga pungsod

AUSTRIA – Wala sang pag salangisag sa bahin sang mga Filipino nga yara subong sa Austria may kaangtanan sa coronavirus disease 2019.

Sa interview sang Bombo Radyo kay Marshall Portugaleza direkta sa Hohe Tauern National Park, Austria, iya ginpahayag nga ginapasiguro sa ila sang gobyerno sang pungsod amo man sa mga doktor nga wala sang nagakadapat nga kabalak-an.

Suno kay Portugaleza, sa Fusch-am Grosslockner – 50 kilometros halin sa iya ginatiniran, may yara sang mag nobyohanay nga nagpositibo sa coronavirus disease sa diin ang babaye ang naghalin sa Italy nga may yara man sang kaso sang virus.

Bangud sini, nalatnan man ang iya nga nobyo kag duha sila ang nagapabilin nga naka home quarantine sa diin may doktor nga naga monitor sa ila sa sulod sang balay.

Pahayag niya, kabug-osan nga 21 ang mga nagpositibo sa COVID-19 sa Austria sa diin ini ang ginalakipan sang 11 sa Vienna, duha sa Tyrol, tatlo sa Lower Austria, tatlo ka Styria kag duha sa Salzburg.

Gin-abisohan lamang sang mga doktor kag gobyerno ang mga tawo sa nasambit nga pungsod nga magpabilin sa sulod sang balay agud nga indi malatnan sang coronavirus disease.

Mismo ang pagpangamusta nga nagatanduganay sang kamot ang ginalikawan.