ILOILO CITY – Nagahinibi lamang kag indi na maistorya ang agi nga gindakop sang mga otoridad kagab-i sa ginpatigayon nga drug buy bust operation nga ginpangunahan sang Regional Drug Enforcement Unit sa Sta. Filomena, Arevalo, Iloilo City
Ang subject sang buybust operation amo si Anthony William Landicho, 36, sang Poblacion, Nueva Valencia, Guimaras.
Una na nga ginpahayag ni Landicho nga nagabalik-balik siya sa syudad sang Iloilo agud nga maghikot sang mga papeles sang iya amay nga napatay sa luwas sang pungsod.
Suno sa iya, halin siya sa Villa, Arevalo agud nga magpang grocery sa diin nagsakay siya sa taxi papauli na kuntani sa Guimaras.
Nagpanaog ang subject sa kilid sang convenient store sa Rizal St., Iloilo City Proper sang may nagpondo nga puti nga van kag naguwa ang ginabanta lima tubtob pito ka mga kalalakihan.
Nakuhaan pa sang video ang insidente sa diin pilit nga ginpasulod si Landicho sa puti nga van.
Nahibaluan nga una kuntani nga kuhaon sang mga kalalakihan si alyas Tam nga nagsaka sa istasyon sang Bombo Radyo agud nga mangayo sang bulig.
Base naman sa blotter report sang Arevalo Police Station, 8:00 kagab-i ginpatigayon ang buy bust operation sa Sta. Filomena, Arevalo, Iloilo City apisar nga sang hapon pa lang natigayon na nga makuha ang subject sa bahin sang Rizal St. Iloilo City Proper.
Sa buybust operation, nakuha sa posisyon ni Landicho ang isa ka sachet sang shabu nga amo ang buy bust item balor P3,000 kag isa pa ka ginapatihan iligal nga droga.
Gin-ako man sang subject nga nagagamit ini sang iligal nga droga apang sang ginpamangkot kun nagabaligya siya sang shabu, naglingi-lingi lang ang iya ulo.
Samtang ginpadulongan naman sang mga pulis sang Arevalo Police Station ang Barangay Sta. Filomena.
Sa interview sang Bombo Radyo kay Barangay Kagawad Melvin Asibuque, iya ginpahayag nga ginpahibalo siya sang pulis nga may ginpatigayon nga buy bust operation sa Arevalo Plaza kag kinahanglan nga may yara sang may ma witness sa inventory.
Pag-abot ni Asibuque sa lugar, nakita niya nga nagapungko ang subject kag yara na ang mga recovered items kay Landicho.
Suno sa barangay kagawad, bag-o lamang niya nakit-an ang subject sang operasyon sa ila nga barangay.
Ang merkado kag plaza sa Arevalo ang sakop pa sang Barangay Sta. Filomena.
