ILOILO CITY – Indi tanan nga trabaho sang Public Safety and Transportation Management Office ang ihatag sa mga barangay officials sa tion nga sila ang i-deputize.
Ini ang pahayag ni Mr. Jeck Conlu, pinuno sang nasambit nga ahensya, may kaangtanan sa road clearing operation sa syudad sang Iloilo kag bilang sabat sa reklamo ni Liga ng mga Barangay President Irene Ong nga ginapasa sang ahensya ang ila mga katungdanan sa mga opisyales sang barangay.
Sa interview sang Bombo Radyo kay Conlu, iya ginpahayag nga pinaagi sa pag deputize sa mga punong barangay, mahatagan ini sang poder agud nga makapangdakop sang mga salawayon nga motorista nga naga illegal park ila lugar.
Ang katungdanan sang mga punong barangay suno kay Conlu amo nga magpangdakop sang mga naga illegal park lamang kag wala na sang iban pa.
Mahimo pahayag niya nga makumpiska sang punong barangay ang lisensya kag ma isyuhan sang Temporary Operator’s Permit ang mga motorista nga nagalapas sa pagsulundan sa tion nga sila ang ma deputize.
Una na nga ginpahayag ni Ong nga kinahanglan nga i-deputize sila nga mga punong barangay agud makapangdakop sang mga naga illegal park sa ila lugar apang nagbaylo naman ini sang pahayag sa diin indi naman sini luyag nga i-deputize agud indi na madugangan ang ila nga trabaho.
