ILOILO CITY – Ginasaulog subong nga adlaw ang 1st Anniversary sang Republic Act 11203 ukon ang Rice Tarrification Law.
Ang tema sang kahiwatan amo ang “Sa Rice Tarrification Law, lahat tayo panalo!’
Kadungan sang anibersaryo sang nasambit nga layi, ginkakas naman ang quantitative restriction sa pag-import sang bugas.
Nagakahulugan nga sa subong ginapahanugutan na ang mga private firms sa pagpasulod sang bugas, bilang pagtuman man sa luyag matabo sang Duterte administration sa pagpasigurado sang food security.
Ini ang gin-ugyunan naman sang National Economic Development Authority sa diin mahimo magnubo sa 34 ang baligya-anay sa kada kilo sang bugas.
Sa interview sang Bombo Radyo kay Jose Jocon, manugbaligya sang bugas, iya ginpahayag nga dako ang nangin epekto sang Rice Tarrification Law bangud nagnubo sang 60% ang presyo sang mga bugas.
Suno kay Jocon, kun sadto ang kada kilo sang bugas ang nagabalor P44, sa subong P30 na lamang ang kada kilo.
Pahayag niya, kun kada sako naman sang bugas ang pagahambalan, tuman ka taas ang presyo sang wala pa ang Rice Tarrification Law sa diin nagalab-ot sa P2,000 tubtob P3,000 apang sa subong P1,700 na lamang ang isa ka sako.
