ILOILO CITY – Magapatigayon sang Motu Proprio investigation ang Commission on Human Rights tuhoy sa ginapahayag abduction nga ginsundan sang buy bust operation sa syudad sang Iloilo sang damlag lang.
Ini ang ginpahayag ni Commission on Human Rights 6 Director Atty. Jonnie Dabuco may kaangtanan sa kontrobersyal nga buy bust operation sa Bgry. Sta. Filomena sa distrito sang Arevalo.
Sa interview sang Bombo Radyo kay Dabuco, iya ginpahayag nga kun mapamatud-an nga abduction gid man ang natabo, magapangatubang sang sampaw-sampaw nga kaso ang mga miyembro sang Regional Drug Enforcement Unit nga nagpatigayon sang buy bust operation.
Suno kay Dabuco, kaso administratibo kag kriminal ang mahimo ipasaka batok sa mga operatiba apang antes pa man sini, magapatigayon anay sang maid-id nga imbestigasyon ang Commission on Human rights.
Ginpahayag ni Dabuco nga paagi sa matipon nga impormasyon kag mga sirkumstanya, hibaluon kun ano gid ang matuod nga natabo sang Marso 3, kun bala, lain nga insidente ang natabo nga abduction sa Rizal St, Iloilo City kag sa buy bust operation sa distrito sang Arevalo.
Nahibalu-an nga antes pa man ang natabo nga buy bust operation sang Marso 3 sang gab-i, nakuhaan pa sang video sang hapon, nga ginapasulod sa puti nga van ang biktima nga si Anthony William Landicho, 36, sang Poblacion, Nueva Valencia, Guimaras.
Samtang, kapin isa naman ka bulan nga guba ang Closed Circuit Television camera sa Brgy. Sta. Felomina sa distrito sang Arevalo kun sa diin natabo ang kontrobersyal nga buy bust operation.
Sa interview sang Bombo Radyo kay Tanod Commander Ricardo Hortilano, iya ginpahayag nga ang isa ka CCTV Camera ang gin-utod samtang ang isa naman ang may yara sang guba nga electrical supply.
Suno kay Hortilano, kun naga-andar ang CCTV camera, mahimo nga nakita ang natabo nga buy bust operation.
Sa subong suno kay Hortilano, ginahulat na lang ang pondo para sa pagpakay-o sang mga guba nga CCTV cameras.
