ILOILO CITY – Ginatugyan ni Police Lt. Gen. Camilo Cascolan, Deputy Director for Administration sang Philippine National Police, sa Special Investigation Task Group ang pagpatigayon sang imbestigasyon kag ang paghatag sang pahayag tuhoy sa natabo nga chopper crash sa Laguna.
Nahibalu-an nga sakay sa Bell 429 twin-engine rotary wing aircraft sanday Philippine National Police Chief Police Gen. Archie Gamboa kag iban pa nga opisyal sang organisasyon sang natabo ang aksidente.
Sa interview sang Bombo Radyo kay Cascolan, iya ginpahayag nga mahimo subong nga adlaw, matapos na ang pagpatigayon sang imbestigasyon kag makapaguwa na sang official statement ang Task Group nga ginapamunu-an ni Chief of the Directorial Staff Police Maj. Gen. Guillermo Eleazar.
Suno kay Cascolan, antes ang pagpaguwa sang rekomendasyon, may yara anay sang patigayon nga occular inspection sa lugar nga ginluntaran sang aksidente.
Ginpahayag ni Cascolan nga sa iya bahin, wala pa siya sang may nabaton nga official order nga siya anay ang acting PNP Chief sa baylo, iya tungdan ang papel bilang caretaker sang organisasyon samtang nagapaayo pa si PNP Chief Gamboa.
Ang chopper nga ginsakyan nanday Gamboa suno kay Cascolan ang makabig nga bag-o kag ginagamit lamang sa PNP visitation sa Luzon kun sa diin sa termino ni anay PNP Chief kag subong Sen. Ronald ‘Bato’ Dela Rosa natigayon ang pagbakal sang Bell 429 twin-engine rotary wing aircraft.
Sa subong suno sa natungdan, nagalaum siya nga mangin estable na ang kondisyon nanday Director for Intelligence Police Major General Mariel Magaway kag Directorate for Comptrollership Police Major General Jovic Ramos nga naka-angkon sang patal nga pilas sa guya kag ulo.
