ILOILO CITY – Ginbali sang More and Electric and Power Corporation ang pagpati sang Panay Electric Company nga ginbalik na sa ila ni Hon. Emerald Requina-Contreras, presiding judge sang Branch 23 sang Ramon Avanceña Hall of Justice, ang operasyon bilang electric power provider sa Syudad sang Iloilo.
Sa interview sang Bombo Radyo kay Atty. Hector Teodosio, legal counsel sang More Power, iya ginpahayag nga wala nag isyu sang order si Judge Contreras nga ihatag balik sa PECO ang operasyon sang ila kompaniya.
Suno kay Teodosio, ang ginpahayag mismo ni Judge Contreras sa korte amo nga magapadayon ang hearing sa Marso 26 agud mahatagan sang kahigayunan ang PECO nga maka file sang pleading sa Energy Regulatory Commission.
Paathag niya, ang ginatumod ni Judge Contreras amo ang mga personnel sang PECO kag indi mismo ang kompaniya nga mahimo makasulod sa substation nga nakuha sang More Power pinaagi sa writ of possession.
Nagapanindugan si Teodosio nga ang More Power sa gihapon ang naga kontrol sang operasyon kag indi ang PECO.
